不少打工仔都視40歲為人生一個新階段，希望可以延續30歲時對事業的拼勁，朝高薪厚職的目標進發。不過，當打工仔真正踏入40歲時，又會因為種種原因令人感到挫敗。
近日，有網民於連登討論區發文，指自己踏入40歲後事業止步，明顯感到身體變差，每日目標只祈求不要遭到解僱，大嘆人生感到疲憊，難以想像自己如何能維持這種狀態直至退休。
按圖了解網民回應：
事主：20出頭嗰陣啱啱畢業，對做嘢無咩感覺。到30歲黃金時期，叫做「事業小成」，考到牌做專業人士，公司又升咗我做經理，管理條team，嗰時身體都仲叫後生可以捱到，當時真係覺得自己人生充滿希望。
去到而家40歲，事業已經止步，完全升唔到上去，同時身體開始慢慢變差，捱唔到OT，每次做嘢都會做到對眼紅晒，心跳又會突然好快，每日都出盡全力做嘢，只係希望唔好畀人炒，可以保得住而家呢個位。
上有高堂，下有妻兒，個仔有排先出嚟做嘢，想躺平都唔得。人生真係好攰，完全無前景，真係好想放棄，點先可以捱到去退休……
網民A：香港生活難度越嚟越高，好難再有提早退休呢個選項啦。
網民B：同我差唔多，不過我早2年轉咗返份hea工，搵得少、使得少，但多咗好多自己時間，得閒做吓運動，身心好咗好多。
網民C：我而家20尾，已經每日都想一睡不起，唔知為啲咩要每日辛苦打工……
網民D：中佬無奈……
網民E：我都接受唔到自己成世人有大半時間要返工……
網民F：知道自己能力有限，人生就應該盡量娛樂自己！你可以試吓搵一啲你鍾意嘅娛樂由嗰度開始，慢慢重拾返對生活的樂趣。
網民G：做到經理都咁，你叫我呢啲普通職員仔情何以堪？放鬆啲啦！
網民H：有老婆仔女，你都係認命啦，繼續捱多20年啦！
網民I：以前覺得啲4、50歲阿叔好廢，無工作能力又不修邊幅，但到自己去到40歲，就發覺佢哋仲生存緊已經係一個成就……
網民J：完全明白呀！後生做到經理，有自己條team，好似全世界都係你咁，以為自己可以繼續上位。去到老啲嗰陣，先發現自己原來已經無體力再去搏，仲要長江後浪推前浪……
網民K：40歲係開始會有樓主嘅感覺，唔上唔落，打工嘅話中層又係最忙。想唔做又要考慮家庭支出。科技不斷更新，你嘅知識又要跟上，但學習能力又比唔上2、30歲班人，然後個人就會覺得好焦慮……
對於事主的分享，不少網民都有所共鳴，指30歲時事業有一定成就，但踏入40大關卻停滯不前，每天承受着不同的壓力，例如家庭支出、職場競爭、身心健康等，確實使人疲憊。有部分網民指出，事主是對失去了對生活的激情，導致人生充滿迷茫，因此建議事主可以保持運動習慣，改善身心健康，或是發掘自己感興趣之事，話自己可以重新感受生活的美好，減輕自己的壓力及焦慮。
Article By CTgoodjobs